Dy. Speaker-in bànna a thehlut Minister atan lak luh a ni dawn?

Assembly deputy speaker Lalrinawma chuan nimin khan Assem­bly speaker Lalrinliana hnenah deputy speaker aṭanga bànna a thehlut. Lalrinawma hi minister atan lak luh a ni dawn nia thu dawn a ni.

Lalrinawma hian nimin chawhma dar 10 vel khan deputy speaker aṭanga bànna a thehlut a, Assembly Speaker-in a lo pawmsak nghal a ni.

Bànna a thehluh hnua thuthar thehdarhtute zawhna chhangin Lalrin­awma chuan, Chief Minister aṭanga thu a hmuh anga bànna thehlut a nih thu a sawi a; minister a nih dawn leh dawn loh chungchangah, "Kan hotute'n an la rêl ang chu," a ti. Hetih lai hian, thu dawnna pakhat chuan, Lalrinawma hi minister atan lak luh a nih dawn thu a sawi.

Tarlan tawh angin, CM Zoramthanga chuan minister of state Dr K Beichhua chu bànna thehlut tura a tih angin K Beichhua hian a thehlut tawh a, Chief Minister pawhin a pawm tawh. CM hian Cabinet minister leh an hna chanpual (port­folio) tihdanglam a duh thu a lo tarlang tawh a ni.