Mau aṭanga green fuel siam chungchang CM hoin sawiho

Chief minister Zoramthanga leh Numaligarh Refinery Limited (NRL) hotute chuan nimin khan CMO Cabinet Meeting room-ah mau sâwngbàwl chungchang leh mau aṭanga ethanol (green fuel) siam chhuah chungchang an sawiho.

Inkawmnaah hian NRL hmalak tum dan leh Mizoram nena thawhho theihna turte sawiho a ni a; India ramin energy-a intodelh a tumna leh green fuel hman uar a tumna tihlawhtlin chu an thil tum a nih thu an sawi. Mau sawngbawlna hmun atan mau lak khawm awlsam berna tur hmun thlan a ṭul thu leh plant dinna tura mamawh hrang hrangte an

sawi bawk.

CM Zoramthanga chuan, NRL hmalakna chu thil ṭha tak nia a hriat thu sawiin, survey tih ngai an neih leh thil dangah Mizoram sorkarin a ṭul chuan a ṭawiawm zel tur thu leh, a tam thei ang ber tualchhung mite chhawr ṭha a tih thu a sawi.

Sorkar thuchhuah tarlan danin, NRL hi Ministry of Petroleum & Natural Gas hnuaia public sector undertaking a ni a, an hmalakna zingah ethanol blending 10% chu India hmarchhak state-ah kalpui tum a ni. Mau aṭanga ethanol fuel siam nan paih awm loin mau pum hman tur a ni.

Inkawmnaah hian Chief Minister hi Planning Board vice chairman H Rammawi, CM secretary K Lalthawmmawia, Planning secretary Lalmalsawma Pachuau, Principal adviser cum additional secretary Dr Lalrinchhana, Horticulture director CH Lalmuanpuia leh mi pawimawh dangte'n an ṭawiawm a ni.