Ratu khuain Loneitute Ni an hmang

Ratu khua chuan nimin khan an khaw khelmualah buh thar tam lawmna, Loneitute Ni an hmang a, bialtu MLA Lalchhandama Ralte, minister of state-in a hmanpui.

Lalchhandama Ralte chuan, Ratu khuain loneitute ni hmanga loneitu hlawhtlingte an chawimawi chu entawn tlak a tih thu a sawi a, "Kan ram leilung aṭanga thar buh hi sorkarin lei a duh reng a ni," tiin, buh lei tur neih tum ang turin a chah.

Hmar tlangdung chu kawngpuiin a hrût thuai dawn a, kawtchhuah thar a ni dawn tih sawiin Minister chuan, "Sorkar laipui thuneitute'n kawngpui sialna tur sum an puan tawh avangin Manipur nena inkalpawhna kawngpui sial a ni dawn a, Bagha kawngpui pawh sial turin inbuatsaih mek a ni," a ti. Hmar tlangdunga zirna tlabal tawh chu tuaithar nan hmalak mek a nih thu leh, kum tharah science leh commerce stream bakah, high school hawn belh a nih dawn thu a sawi bawk.

Agriculture officer Lalengzami tarlan danin, Aizawl district-ah lo neihna ram hectare 2,300 a awm a, kum khata buhfai thar zat chu metric ton 2,900 a ni.

Ratu khuaah hian kum 2021 khan lo nei (buh chingtu) mi 229 an awm a, buh phur 8,671 an thar a, tun hnai kum nga chhunga an thar tam ber kum a ni. Kumin 2022-ah buh hmun nei mi 114 awmin, buh phur 6,375 an thar a; buh phur 100 chin thar mi 15 awmin, thar tam ber Lalnunsiama'n phur 202 a nei a ni.

Minister Lalchhandama Ralte hian Ratua Supply kudam sak thar a hawng bawk a; kudam hi NABARD aṭanga hmuh cheng nuai 204.41 séngin Babie construction & Consultancy Services-te'n an sak a ni a, buhfai quintal 2,000 dah theihna a ni.