CM Zoramthanga hi mi dik leh Pathian ṭih mi a ni - Robert Romawia

MNF adviser Robert Romawia Royte, minister of state chuan, MNF president leh chief minister Zoramthanga chu mi dik leh Pathian ṭih mi a nih thu leh chu chu mipuiin an hriat thu a sawi.

Nimina Mizo Hnam Rûna party zawm tharte lawm luhnaah thu sawiin Robert Romawia chuan, ZPM hruaitute an mal pheuh pheuh dawn a, kum tharah a báwrin an lawh dawn thu a sawi a, "MNF hi kum 60 chhung a dinna ngaiah nghet taka ding tawh a, kan hotute leh kan party puite pawh páwl an sawn an sawn ve lo. Kan president leh CM Pu Zoramthanga hi mi dik leh Pathian ṭih mi a ni tih mipuite'n an hria. Zoram dung leh vângah MNF zawmtu an pung zel a ni," a ti.

MNF Adviser chuan, ZPM party chu hruaitu mumal awm loin an kal nia sawiin, "Mipuite'n ZPM-a awm an peih tawh lo a, an hotute hi Mizo mipuiin an hriat chian em emte vek an ni a, páwl thar din apianga tlar hmasaa awm fo tawhte an ni," a ti a; ZPM-in kalphung thar an tih foah pawh mipui an beidawng tawh niin a sawi.

Robert Romawia Royte hian MNF party-ah ZPM general secretary pahnih Lalthanpuia leh H Malsawma te a lawm lut niin MNF thuchhuah chuan a tarlang.