Sorkarin sum enkawl thiam se chuan Hetiang em ema harsa tur kan ni lo - Congress President

Mizoram Pradesh Congress Committee (MPCC) president Lalsawta chuan nimin khan Congress Bhavan-ah thuthar thehdarhtute a kâwm a; sorkarin sum enkawl thiam se chuan Mizoram chu sum harsa lutuk tur a ni loa a hriat thu a sawi.

Lalsawta chuan, Mizoram leibá a pung a, ram ro hlu siam theihna tur tam takah state matching share (SMS) an pe hlei thei lo tih sawiin, "Sum enkawl kawngah sorkar hi a hlawhchham niin ka hria. Planning Commission awm tak loh hnua central sorkar leh state/ UT-te inkara financial transaction kal dan hriat fuh loh vang ni-ah ka ngai," a ti.

MPCC President chuan, Planning Commi­ssion chu kum tam tak chhung plan sum báwm a ni ṭhin tih sawiin, a awm loh hnuah kawng hrang hrangin ram hmasawnna tur central-a ministry leh department-te prog­ramme leh scheme mila thawk thei tura SMS leh hnathawh tur ṭha leh felfai detailed project report (DPR) neih a pawi­mawh thu a sawi.

Zawhna chhangin Lalsawta chuan, Covid-19 lèn hnuah pawh GST aṭanga Mizoram sum hmuh kum tin a pun thu sawiin, "Ram pum huap ang erawh chuan kan tuar ngei. Chutih laiin, kan sum neih angte enkawl thiam ila chuan hetiang em ema harsa leh pûk nasa tur kan ni lo," a ti.

Ram tana pawimawh ber chu dan anga rorel a nih thu sawiin Lalsawta chuan, "Vawiinah hian ram mipuiin sorkar ring zo loin anmahni kutah ram rorelna an kengkawh ṭan emaw tih theih hial a ni ta. Sorkar nei lo ang hiala kan ram a awm ta mai hi a pawi tak zet," a ti a, diknaa rorel tur sorkar ramin a mamawh thu a sawi.

MPCC President chuan, kum 2023 inthlan chu Mizoram tan a pawimawh dawn tih sawiin, "Inthlan lo awm turah sum séng tlem turin politician-te leh ram mipui ka ngen a, Congress party-ah chuan kan inhrilh fo tawh," a ti.

Inthlan kaihhnawihah sum leh therhlo laka an fihlim theih chuan Mizoram chhiat zelna tur an dang thei dawn tih sawiin Lalsawta chuan, "Hei hi Election Commision of India leh Mizoram People Forum duh dan pawh a ni," a ti a; sorkar thianghlim, chak leh hnathawk thei siam turin inthlan awm tur chu a ṭha zawnga ramin bul a ṭanna atan hman ni se a duh thu a sawi.