Doctor awm lohna hmun kilkhawrah damlo enkawltu ṭha tak an awm dawn - Health Minister

National Health Mission Employee Union Mizoram (NEUM) General Conference vawi 2-na chu nimin khan Vanapa Hall-ah neih a ni a, Health & Family Welfare minister Dr R Lalthangliana'n a hmanpui. Minister chuan, doctor awm lohna thingtlang leh hmun kilkhawrah damlo enkawltu ṭha tak an awm tawh dawn tih a sawi.

Dr R Lalthangliana chuan, Mizorama sub-centre, Primary Health Centre (PHC) leh Commu­nity Health Centre (CHC)-te chu Ayushman Bharat programme hnuaiah Health & Wellness Centres-ah hlan chhoh mek zel a nih thu a sawi a, "A thawktu tur Health & Wellness officer-te pawh thla ruk chhung training pek an nih hnuah dah vek tum a ni a, doctor awm lohna thingtlang leh hmun kilkhawrah pawh damlo enkawltu ṭha tak an awm tawh dawn a ni," a ti.

NHM hnuaia thawk­tute chu Mizoram mipui­te'n hriselna ṭha an neih theihna tura nasa taka thawk ṭhin an nih thu sawiin Health Minister chuan, "NHM hnuaia thawktute harsatna hrang hrang - new pension scheme, pay revised, direct funding leh service chungchangah chak zawka hmalak mek zel a ni," a ti a, India rampum huapa Mizoram Health department hlawhtlinna hrang hrang a tarlang.

Health Minister chuan Mizoram chu HIV/AIDS-in a tihbuai nasat thu leh a dona kawnga NHM hnathawkte hmalakna chu fakawm a tih thu a sawi a, "Rei loteah he natna hian kiam lam a pan ka beisei. Mizoram chu nausen piang thi (infant mortality rate) tlemna ber state a ni a, hei hi NHM hnuaia thawkte inpekna rah a ni," a ti a, an hnathawh chu Mizo mipuite thinlungah a awm reng tur thu a sawi.

Conference hi NEUM chairman Malsawm­tluanga Hauhnar in a kaihruai a, chawhnuah hruaitu thar thlan niin president atan R Lal­remruata leh general secretary atan K Lal­rammawia leh Info secretary atan H Lalrin­mawia te thlan an ni. NEUM hi kum 2018-ah din a ni a, member 2,400 vel an awm mek.