KHAWTHLIR

Thisen pe
Youth for Kolasib leh Mizo Cultural Organisation sub-headquarters, Kolasib-te chuan nimin khan Kolasib College-ah Communal Harmony Exchange cum Blood Donation Camp an huaihawt a, District Hospital tan thisen unit 17 an pe a, petute mipa 15 leh hmeichhia pahnih an ni. Siaha Higher Secondary School NSS pawhin Siaha District Hospital tan thisen unit 15 an pe a, petute mipa 12 leh hmeichhia pathum an ni.

MCS atangin IAS
Mizoram Civil Service (MCS) officer palite chu Indian Administrative Service (IAS)-ah kaitir an ni. Hemi chungchangah hian sorkar laipui chuan nimin khan hriattirna a tichhuak a; IAS-a kaitirte chu - Zorammuana, Ramdinliani, David Lalthantluanga leh Maria CT Zuali te an ni.

Vijay Diwas
Vawiin hian zing dar 7-9 inkarah War Memorial, Treasury Square, Aizawlah Vijay Diwas hman a ni dawn. Vijay Diwas hman chhungin Aizawl Dak Inpui aṭanga Raj Bhavan hmar lam gate inkarah vantlang, politics, sakhuana leh thil dang huaihawta mi panga aia tam punkhawm, bengchhen leh kawng kama thil zawrhte khap a ni.

HM-in hawng
Home minister Lalchamliana, Hrangturzo bialtu MLA ni bawk chuan nimin khan a bial chhunga East Lungdar khuaah Police Beat Post thar a hawng. Police Beat Post-ah hian head constable hoin constable pathum an awm dawn a, North Vanlaiphai Police Station huam chhunga awm a nih angin North Vanlaiphai PS hnuaiah an thawk dawn a ni.

MLA hlui a thi
MLA hlui R Khawpuithanga (82), Tlangnuam, Aizawl chu nimin zing dar 9:05 khan Trinity Hospital-ah a thi a, vawiin chawhma dar 11-ah an inah thlah a ni ang a, kohhran upa a nih avangin chawhnu dar 1-ah Tlangnuam kohhran biak-inah Aizawl Chhim Presbytery moderator Upa C Lalmuankima'n a vui ang. R Khawpuithanga hi kum 2003 khan Aizawl South-II bialah MNF ticket-in MLA atan thlan a ni.