Kawng siam mek chungchang sawiho

Lunglei West bialtu C Lalrinsanga, minister hoin nimin khan DC conference hall-ah Lunglei district-a Aizawl-Thenzawl-Lunglei (ATL) kawngpui thawmṭhat mek leh Lunglei khawpuia kawng siam mek dinhmun leh hmalak ṭulte sawiho a ni.

Sawihonaah hian Lunglei HPC vice chairman Lawmawma Tochhawng, MLA leh a kaihhnawih sorkar hotute, Lunglei MJA, Sub Hqrs YMA, Lunglei Ṭhalai Pawl leh Lunglei khawpui chhung kawng siam hna thawktu EL&TY Entreprise-te an tel.

Ṭhutkhawma tarlan ṭhenkhat
* ATL kawng, Kanghmun – Lunglei (km 100 - 160) inkar siam hnathawktu Bhavya Construction-te Defect liability period chu 31.3.2023 thleng a ni.
* Repair ngaite an thawhṭhat loh avangin PWD hotute, Lunglei DC, YMA-te nen vawi eng emaw zat kawng endik leh ṭhutkhawm a ni.
* Repair hna hi an thawh ṭhat loh avangin departmental-a hnathawh a ni a, hemi atan hian Bhavya Construction-te Security Deposit cheng vbc 1.93 leh performance security cheng nuai 74.69 chu hman mek a ni.
* Kawng repair tur hi km 2.2 vela thui niin, kawng khuar 50% hnawh zawh a ni tawh
* Jharkhand aṭangin hnathawktu tur chah belh mek niin, working season chhunga thawh zawh tum a ni.
* ATL World Bank Road chu lirthei tlan an tam avangin a structure siamṭhat a, tih chak a ngai.
* Mizoram Road Fund Board hmalaknain zirchian a ni a, design thar tur atan detailed project report (DPR) thar buatsaih a ni dawn.
* Lunglei khawpui kawng resurfacing hna (Kikawn - AOC) chu PWD Class I contractor PC Lalthantluanga (EL&TY Enterprise) in ṭha takin a thawk mek. Tun dinhmunah a zatve aia tam thawh zawh a ni tawh.