MADC sorkar siamtir turin Mara pawl 3-in CM an phût

Mara rama pawl pathum - Mara Thyutlia Py (MTP), Mara Chano Py (MChP) leh Mara Students Organisation (MSO)-te chuan thuchhuah inṭâwm siamin, March 15, 2022, nimin ral hma ngeia Mara Autonomous District Council (MADC) sorkar siamtir turin chief minister Zoramthanga an phût.

An thil phût chungchangah hian pawl pathumte chuan, "Kan ngenna a tihlawhtling lo a nih chuan kan autonomy, chi leh hnam humhim nan keini MTP, MChP leh MSO ten a ṭul dan ang zelin hma kan la chhunzawm zel ang tih mipui kan inhriattir e," an ti.

Pawl pathumte chuan, MADC sorkar term 12-na chu November 25, 2022 khan paih a ni tih tarlangin, MADC CCB Rules-ah, 'Executive Committee tihtawp a nih chuan Governor-in CEM thar chu rang takin (immediately) a appoint ang,' tih a nih thu an sawi a; "CM Pu Zoramthanga'n tun thlenga a thuneihna piah lam thlenga hmang ṭangkaia a lalna a dawhkana titáng lui a, sorkar siamna tur tun thlenga a rap bet lui hi democracy pawngsualna rapthlak tak a ni," an ti a; ná an tih thu an tarlang.

December 13, 2022-a minister of state Dr K Beichhua bàntir a ni chu Marate leh hnam tlem zawkte hmuhsitnaa an ngaih thu sawiin pawl pathumte chuan, "Pu Zoramthanga sorkarah hian Mara fate leh minority-te kan him tâwk lohzia a lang chiang hle," an ti bawk.