Covid-19 atana hman ṭeuh tur a awm lo; NEC sum Covid-19 atana hman tur a ni - Finance department

Finance department chuan thuchhuah siamin, Covid-19 dona atan sum hman ṭeuh tur a awm loh thu an tarlang a, "North Eastern Council (NEC) aṭanga sum hmuh cheng vbc. 3 hi Covid-19 dona atana hman tur a ni," an ti.

Finance department chuan, ZPM Legisla­ture Party leader Lalduh­oma'n statement a tihchhuahah, Covid-19 dona atan sorkarin hman mai theih sum tam tak (cheng vbc. 882.37) a nei anga a tarlan thu sawiin, "Mipui leh sorkar hnathawkte ngei pawh an rilru sûkthlêk a hruai danglam thei a ni," an ti a; Lal­duhoma thusawi chuan Covid-19 dona atana sum thawh chung­changa mite in­pêkna thlenga a nghawng theih thu an sawi.

Lalduhoma'n sum hmuhna a sawite chu a dik tlangpui tih tarlangin Finance department chuan, "LESDE aṭanga cheng vbc. 21 sorkarin hmu anga a sawi kha chu a dik tâwk lo. LESDE aṭang hian FCSCA department chuan cheng vbc. 6.41 a hmu a, AAY, PHH, MBOCWWB member-te leh task force ṭhenkhatte’n mi harsa zual nia an sawite hnena a thlawna ration buhfai pek nan hman nghal a ni," a ti.

Finance department tarlan danin, cheng vbc. 14.88 chu MBOCWWB hnuaia member inziak lut mi 49,498-te bank account-ah Rs. 3,000 zela thun a ni a, a hranpain sorkarah chhûn luh a ni lo. Sum lut tihtham tak a awm laiin, a hmanna pawh a tam hle a ni.

Sum hmuhna Lalduhoma'n a tarlan dang ṭhenkhat, National Bamboo Mission fund chu approved action plan anga hman tur a ni a, Covid-19 do nan pawhpèn theih a ni lo. SDRF hnuaia kum 2020-21 atana first instalment lo kal cheng vbc 23.50 chu disaster kaihhnawih hrang hrangah hman tur a ni a, Covid-19 do nana hman theih zat tihchian a la ni lo.

NEC aṭanga hmuh cheng nuai 300 chu Co­vid-19 do nana hman tur niin, a hmanna tur pawh ruahman vek tawh a ni a, hman chhuah thuai tur a ni tih an tarlang.