MNF party-in Exodus Day an hmang Mizoram tana harsatna su turin Pathianin MNF a din - MNF President

MNF party chuan nimin khan Vanapa Hall-ah Exodus Day vawi 52-na an lawm a; MNF president Zoramthanga, chief minister chuan, MNF chu Mizoram tana harsatna su tura Pathianin a din a nih thu a sawi.

Zoramthanga chuan, December 16 chu India sipaite tan hnehna ni ropui, an hmelma Pakistan tlàwmna ní, Vijay Diwas a nih rualin, MNF sipai tan pawh Pakistan sipai laka chhanchhuahna ni ropui Exodus Day a nih thu a sawi a, "MNF hi Mizoram tana harsatna su turin Pathianin a din a ni. A tìr aṭangin harsatnate a sut tlangtir ṭhin," a ti.

MNF chu mautàm ṭàm harsatna avangin kum 1961-ah a piang tih sawiin Zoramthanga chuan, "Kum nga chhungin a ṭhang nasa em em a, kum 1966-a ram a buai meuh chuan kan tlangval tam zawkte ramhnuaiah an kal. Rambuai kha Pathian ruat a ni," a ti a; Laldenga'n buai loa politics kalpui a tum laiin, Assam CM-in inremna bawhchhiain Mizoramah sipai a tír lui niin a sawi.

Zoramthanga chuan, kum thum chhung India nena indo hnuah tlânchhiat a ngaih thu leh harsatna tam tak karah India biak dan zawn a nih dan a sawi a, "Mihring tumna leh remruatna zawng zawng kha hlawhtling se, vawiina kan inremna ang hi a chhuak lo ang. Kan hlawhchhamnate kha Pathianin Zoram tun din a tumna a ni," a ti.

MNF President chuan, Pakistan president Ayub Khan remtihnain Pakistan-ah an chhuk a, thing lu bûla dan chêpna aṭanga an chhuah dan chu Laldenga remruatna ni loin, Pathian remruat a nih thu a sawi a; MNF chu party dang ang a nih loh thu sawiin, "Mizoram chhan chhuak tura Lalpa'n a siam a nih angin underground politics harsatna period-ah engzatin nge nunna chán? Overground politics-ah pawh president's rule aṭangin harsatna tam tak paltlang a ni," a ti a; kum 10 eptua an awm chhungin an inchàn nasat thu a sawi.

Pathian hun ruatah an chak leh tih sawiin Zoramthanga chuan, "Khatianga chakna kha kan beisei phak loh a ni. Covid a léng dawn, harsatna tinreng a thleng dawn tih hi kan Pathianin a hre vek. Heng hun atan hian MNF a dah. Beih tinrengin min bei mah se, Pathianin min tung ding ang, election fight tlangna khawp chakna min pe ang," a ti.

MNF Exodus Day hmanna hi MNF senior vice president Tawnluia'n a kaihruai a, Vanapa Hall-ah hian Parva dáia ralthuam dahna hriatrengna atana siam lungphun a hawng. MNF treasurer K Vanlalauva'n underground signatory leh MP-te inhmelhriattirna hun a hmang a, thilpek an hlan a ni.