Zoram mipuiin mi tin ban phâk sorkar pian hun an nghakhlel - ZPM President

ZPM party chuan nimin khan kumin chhung atan an pisa an khâr a, pisa khârna inkhawma thu sawitu Lalliansawta, ZPM president chuan, Mizoram rorelna awm tawhte chu party bil sorkar a la ni zel tih sawiin, mipuiin mi tin ban phâk sorkar a pian hun an nghakhlel hle niin a sawi.

Lalliansawta chuan, ZPM auhla pakhat, 'Kal­phung thar, mipui sorkar' tih chu a ṭawng­kam ringawt pawh a mawi tih sawiin, "Mi tin huap kalphung, mi tin huap sorkar din tura inruahmanna hi a hlu hle. Mi tin ban phâk sorkar lo piang mai tur hi Zoram hian nghakhlel takin a thlir mek a ni," a ti.

Mizoramin mipui thlan roreltu a neih chinah rorelna kalphungin duhthu a sâm lo hle nia sawiin Lalliansawta chuan, "Party bil sorkar kan la hrawn zel a ni. Kum 70 chuang zet eng thilah mah intodelhna nei loin kan awm a, kan luipui neihte pawh vawiin thlengin hman ṭangkai lohin a la awm zel. Central aṭanga kan sum hmuhte a nihna anga hman a ni thei lo a, mahni ṭánghma hâinain kan ram politics-ah hmun laili a la luah reng a ni," a ti a; kalphung thar, mipui sorkarah chuan mipui sorkarin party sorkar a thlâk dawn thu a sawi.

ZPM President chuan, Mizoramah eirûkna leh hlemhlêtna hluar hle tih sawiin, "Kalphung thar, mipui sorkarah chuan eirûkna leh hlemhlêtna hluar em em, a ngaihna hre loa kan phunpui huai huai hi tihtawp tuma nasa taka beih a ni dawn. Corruption laka fihlim chief minister neih tumin kan inbuatsaih mek a ni," a ti.

Lalliansawta chuan, ni tina hna thawhnate chu Pathian rawngbawlna remchang tak a ni thei vek tih sawiin, mi dang tana malsawmna ni zel turin an party mite a chah a ni.

Hunserh hmangtu Rev. Vanlalzuata pawhin thu sawiin, lalna leh thuneihna beiseia mahni ṭánghma chauh ngaihvena hun hmangte chu Pathianin roreltu atan a thlang duh lo a, inngaitlawm tak leh mi dang tana rinawm taka awmte a hmang duh ṭhin zawk tih a sawi a, "Politician ṭha chuan mahni aiin mi dang a ngai pawimawh ṭhin a, mahni chauh inngai pawimawh politician hi he ram mamawh chhànna a ni lo," a ti.

ZPM pisa hi January 9, 2023-ah hawn leh ṭan a ni dawn a; an thuchhuah tarlan danin, kum 2022-ah ZPM unit 970, group 38 leh block 68 a awm a ni.