MLA candidate tur atan a hausa sa kan thlang dawn lo - MPCC President

Mizoram Pradesh Congress Committee (MPCC) president chuan, Congress party hruaitute an inthlak angin, an inhruai dan pawh a danglam dawn a, kalphung thara an kal dawn thu leh, MLA candidate atan a hausa apiang an thlan dawn loh thu a sawi.

MPCC hian nimin khan kumin atana Congress Bhavan khârna inkhawm an hmang a; thusawitu Lalsawta chuan, MPCC hruaitu inthlakah president atana pawmtu leh thláwptute chungah a lawm thu sawiin, "Hun a danglam a, mihring pawh kan danglam a, kan inhruai dan pawh a danglam dawn. Mizoram hian kalphung thar a duh tawh a, keini pawhin kan kalphung hluite kalsan a, kalphung thara kan kal ngam a ngai dawn a ni," a ti.

Lalsawta chuan, ram hruainaah a danglam theih a, a theih loh titu mi ropui an awm ngai loh thu sawiin, "Miin pawisa nei lo mah se, mi hausa tak ni lo mah se, ram hruaitu ṭha tak a ni thei tih ringtute kan ni. Chuvangin, MLA candidate atan a hausa sa kan thlang dawn lo," a ti a; Mizoram chu an siamṭhat theih an rin tlat thu leh siamṭhat an tum thu a sawi.

Mipui mamawh sorkar ṭha hi an zuar dawn tih sawiin MPCC President chuan, "Mizoram hi ram nuam, ram hausaah kan siam dawn. Kan ti thei dawn a ni tih hi kan ring tlat. Congress kan sorkar chuan tu tih mah ni loin, kan corrupt lo ang," a ti.

MPCC treasurer Zodintluanga Ralte, MLA pawhin thu sawiin, "Tuna MNF sorkar kan hrawn mek hi Mizorama sorkar awm tawh zawng zawnga financial management-a hlawhchham chiang ber a ni," a ti a; MNF sorkarah Finance Minister-in sum a kawl khawm vek avangin minister-te'n CM an intlawn siak luih luih thu a sawi.

Kum 2023 inthlanah mipuiin MNF an ring zo tawh lo a, ZPM pawh sorkarna siam zo turin rin an la kai zo lo nia sawiin Zodintluanga chuan, "MNF party hi an thiam thil neih zawng zawng nen pawh ṭang mahse an sorkar tawh dawn lo," a ti.

Zodintluanga Ralte chuan, ZPM pawh chu an sawi loh ang hlirin an awm nia sawiin, "Val Upa Council-in MLA hlawh pung lak loh tur an tih a, an la tho a, motor-a designation plate tár lo tura an tih pawh an tár tho," a ti a; VUC chu an sorkar hma pawhin engah maha an ngaih loh avangin, an sorkar hnuah pawh engah mah an ngai dawn lo niin a sawi.

Inkhawmah hian Aizawl veng hrang hrang aṭanga Congress party zawm thar mi 275 lawm luh an nih thu MPCC thuchhuah chuan a tarlang. Congress Bhavan hi January 9, 2023-ah hawn ṭan leh a ni ang.