Aizawlah Vijay Diwas hman a ni

Nimin December 16 kha Bangladesh (East Pakistan)-a indonaa India-in Pakistan a hneh ní, Vijay Diwas a ni a, India ram hmun dang ang bawkin Aizawlah pawh hman a ni.

Vijay Diwas hi nimin zing khan Treasury Square-a War Memorial-ah Governor Hari Babu Kambhampati hoin hman a ni a; Governor leh chief minister Zoramthanga bakah, Mizoram sorkara hotu te, sipai hotu te leh Ex-Services League hruaitute'n hriatrengna lungphunah pangpar an dah.

December 16, 1971 khan East Pakistan (tunah Bangladesh)-in zalenna a sualna, Indo-Pakistan War-ah India sipaite chuan Pakistan an hneh a; Pakistan sipai lal Gen. Amir Abdullah Khan Niazi chu sipai dang 93,000 nen India sipai hotu Gen. Jagjit Singh Aurora hnenah an inpe a ni.

India-in Pakistan a hneh avang hian East Pakistan chuan zalenna a hmu a, Bangladesh ram a piang zui a ni. December 16 hi Bangladesh chuan Bijoy Dibos tih hming vuahin an lawm ṭhin bawk.