KHAWTHLIR

Thisen pe
Durtlang Higher Secondary School NSS unit chuan nimin khan Synod Hospital-ah thisen unit 31 an pe a, petute mipa 18 leh hmeichhia 13 an ni. YMA, Samthang Branch pawhin Krismas pualin nimin khan an khaw community hall-ah Champhai District Hospital tan thisen unit 21 an pe a, petute mipa 18 leh hmeichhia pathum an ni.

Apple chi sem
Mizoram Univertsity-a Department of Forestry chuan December 15, Ningani khan MZU Guest House-ah nipuia apple chìn chi, HRMN-99 variety chu Mizorama kut hnathawktute hnenah a thlàwnin an sem a, a dawngtute pualin training an buatsaih nghal. Apple hi Hariman Sharma, Himachal Pradesh-a kut hnathawktu hmalakna leh zirchianna aṭanga chìn chhoh ṭan a ni.

CRPF faina hnatlang
Central Reserve Police Force (CRPF) 225 battalion, Zemabawka mite chuan December 15, Ningani khan Swachhata Pakhwada an hmang a, Falkland Vengah faina hnatlang an huaihawt. Hnatlang hi 224 Bn CRPF commandant SM Habib Asgher-a'n a ho a, CRPF mi leh tualchhung mi eng emaw zat an tel a ni.

Raj Bhavan thlawh theih dawn
Governor chenna Raj Bhavan chu December 24-26, 2022 leh Janaury 1-3, 2023 chhungin mipui náwlpui tlawh theiha hawn a ni dawn. Governor's Secretariat tarlang danin, Raj Bhavan hi chawhma dar 10 aṭanga tlai dar 4 thleng hawn a ni dawn a, hmar lam gate (Assembly House lam) aṭanga luh tur a ni.

Krismas thilpek
Aizawl South-I bialtu MLA C Lalsawivunga chuan nimin khan a bial veng hrang hranga kum 75 chin chung lamte hnenah Krismas thilpek a hlân a, mi 780 hnenah blanket a pe a ni.

Tinghmun MS jubilee
Ṭinghmun Middle School chuan nimin khan an sikulah golden jubilee an lawm a, School Education minister Lalchhandama Ralte-in a hmanpui a; Sinlung Hills Council Chief Executive Member leh executive member te, sikula thawk tawhte leh zir chhuak tawhte, khawtlang mipuite an tel bawk.