Covid-19 lakah Mizoram a fihlîm ta

Mizorama Covid-19 vei enkawl lai mi pakhat chu nimin khan chhuah­tir a ni a, heti hian Mizo­ramah hripui vei an awm rih lo a, hripui lakah a fihlim ta. Kum hnih leh thla ruk hnu, June 1, 2020 aṭanga Covid-19 positive an awm loh vawi khatna a ni.

December 15, Ningani khan Mizoramah swab sample 36 endik ni mah se, Covid-19 positive an awm lo a; nimin khan Covid-19 positive enkawl lai awm chhun chu chhuahtir niin, Mizoramah hripui vei an awm tawh rih lo.

Mizoramah March 24, 2020 khan Covid-19 vei hmuh hmasak ber, Rev. VL Hruaia Khiangte chu hmuh chhuah a ni a, ni 47 chhung Zoram Medical College-a enkawl a nih hnuah, May 9, 2020-ah damdawi-in aṭangin dam taka chhuahtir a ni.

Rev. VL Hruaia a dam hnuah ni 22 chhung, May 31, 2020 thleng chu Mizoramah hripui vei an awm lo a, June 1, 2020-ah Covid-19 positive mi 12 hmuh chhuah leh niin, chuta ṭang chuan hripui vei an awm ta char char a ni. Kum hnih leh thla ruk hnuah Covid-19 positive an awm lo leh ta chiah a, chatlak awm loa hripui vei an awm hun chhung hi ni 926 a tling.

IDSP, Mizoram aṭanga thu dawn danin, China ramah Covid-19 vei an awm hnuah, January 20, 2020 khan China aṭanga Mizorama rawn hawte Lengpui Airport-ah enfiah (screening) ṭan a ni.

Covid-19 thupuangtu Dr Pachuau Lalmalsawma chuan, Covid-19 laka Mizoram a fihlim theihna tura sorkar leh mipui thawhho ṭhatna leh thuawihna avangin lawmthu a sawi a; mipuite chu invawng thianghlim a, hripui léng laka MIzoram a him zel theih nan ṭan la zel turin a sáwm.

Kumin December thla bikah December 15 thleng khan swab 2022 754 endik a ni tawh a, Covid-19 +ve mi 10 hmuh chhuah a ni. December thla chhungin dam taka chhuahtir mi 18 an awm tawh bawk.