Cheng khat mah ka eirû lo - John Rotluangliana
Congress sorkar laia Tourism minister ṭhin John Rotluangliana chuan, tun thlengin corruption case a nei tih a hre lo a, thubuai neihna chhan tur a neih loh thu leh, cheng khat mah a eirûk loh thu a sawi.
Nimina Congress Bhavan-a inkhawmah John Rotluangliana chuan, "Vawiin ni thleng hian corruption case ka neih ka la hre lo a, neih nachhan tur pawh ka nei bawk lo. Director hlui Pu Biakthanmawia nen cheng khat mah kan eiru lo a ni tih Pathianin min hriatpui a ni," a ti.
John Rotluangliana sawi danin, Khawzawl Tourist Lodge sak chungchangah kum 2019 tìr lamah PC Chuauhnuna, Khawzawlin Lokayukta-ah complaint a thehlut a, Lokayukta in ACB a chhuitir a ni. Khawzawl Tourist Lodge chu central aṭanga PIDDC hnuaia hna thawh zinga pakhat a ni a, hna thawh mek a nih laiin central aṭangin tihtawp a ni. NEC leh NEDP-ah sak chhunzawm an dil a, NEDP aṭangin cheng vbc. 3.04 hmuh a ni a, chuta ṭang chuan Khawzawl Tourist Lodge sak zawh nan cheng nuai 67.49 ruahman a ni.
Hna chhunzawm a nih hmain NEC hotute'n Khawzawl Tourist Lodge sak zawhna tur cheng nuai 67.49 an pe ve leh a; chuvang chuan NEDP aṭanga amn hmuh chu PIDDC hnuaia hna thawktu dang (contractor-te hnenah) an hnathawh dan zûlzuiin pek a ni ta a, NEC aṭanga hmuh hmangin Khawzawl Tourist Lodge sa chhunzawm ta zawk a ni.
NEDP sum nuai 67.49 chu bo anga ngai an awm avangin ACB-in an chhui tih sawiin John Rotluangliana chuan, "Contractor-te pawh an pawisa dawn zat zawh vek an ni a, office aṭanga pek chhuahnate nen a inmil vek avangin pawisa bothlau hmuh a ni lo. ACB pawhin felfai takin Lokayukta-ah report an pe tih ka hria a, heti chunga kan sorkarin ACB an ring zo lo a nih chuan CBI chhuitir ngei turin ka phût a ni," a ti.
John Rotluangliana chuan, "Khawzawl Tourist Lodge sak chungchangah pawisa bothlau pakhat mah a awm lo a, director hlui Pu Biakthanmawia nen cheng khat mah kan eiru lo a ni tih Pathianin min hriatpui a ni," a ti a; politics a nih avanga thu dik leh dik lo pawisa loa mimal intihhmingchhiat tuma inbeih vak chu a Kristian loh thu leh a Mizo loh thu a sawi a ni.