H/S Games champion - Saitual district

Secondary School Games vawi 39-na, December 13, 2022-a ṭan chu nimin khan Serchhip Leisekawt khelmualah khâr a ni a, School Education secretary Dr Lalzirmawia Chhangte leh director Dr H Lalthlangliana ten an hmanpui. Games-ah hian Saitual district pakhatna an ni.

Secondary School Games-ah hian district tin aṭangin infiammi zirlai leh zirtirtu 696 an tel a, Aizawl district chu district pahnih - North leh South-ah ṭhen a nih avangin district 12 an ni. Infiamna chi hrang hrang - athletics, badminton, football, table tennis leh volleyball hmangin zirlaite an inel a ni.

Saitual district chuan gold medal pali, silver medal pathum leh bronze medal pahnih lain, pakhatna an ni. Best Athlete (Girls) chu Ethel Lalpekhlui, NE Khawdungsei H/S, Saitual district niin, gold medal leh silver medal pahnih ve ve a la a; gold medal leh silver medal pakhat ve ve latu ZD Lalhunruata, GM H/S, Champhai district chu Best Athlete (Boys) a ni.

Education secretary Dr Lalzirmawia Chhangte chuan, infiamna chu mihring inchherna atana ṭangkai tak a nih thu sawiin, "Life skills min zirtiru ṭha tak a ni. NEP 2020-in tawnhriat hmanga zirna huang chhungah a khung a, zirna leh infiamna inbelhbawm, sports integration hi subject curriculum hrang hranga zirtirna hmanruaa hman tura tih a ni," a ti a; nasa zawkin Fit India hnuaiah uar zawka infiamna kalpui a nih dawn thu a sawi.

Director Dr H Lalthlangliana chuan, zirlaite'n board exam an hmachhawn dawn hnai tih sawiin, "Thawh huna kan thawh a, infiam huna kan infiam a, zir huna lehkha tih tak zeta kan zir a ngai," a ti a; zirlaite chu tei rei peih turin a chah a ni.