Kuhva dinhmun zir chiang dawn

Mamit leh Kolasib district-a kuhva chingtute'n an thar chhuahte hralhna turah harsatna an tawh mek avangin Mizoram sorkara Land Resources, Soil & Water Conservation (LRSWC) department chuan kuhva dinhmun zirchianna (survey) an kalpui dawn.

Kuhva zirchianna kalpui tur chungchangah hian LRSWC secretary Maria CT Zuali chuan December 13, 2022 khan thupek (order) a tichhuak a; "Mizoram, a bikin Mamit leh Kolasib district-a kuhva chíngtute'n a hralhna lamah harsatna an tâwk tih sorkarin a hriatin,kuhva chíngtute harsatna sutkian nan, deputy commissioner-te kaihhruainain LRSWC district officer-te'n a hnuaia sawi ang hian survey rang taka nei tura hriattir an ni e," tiin a ziak.

Survey-a tih turte chu - kuhva chíngtu hming, veng, district, huan zau zawng leh kuhva thar beisei zat hriatte a ni a; zirchianna report chu December 20, 2022 aia tlai loah LRSWC Secretary leh Director hnenah thehluh tur a ni. "A ṭul angin Mizoram thar a ni tih certify sak an ni ang," tia tarlan tel a ni bawk.

Hetih lai hian, Bilkhawthlira kuhva chíngtute chuan an khaw dái hmun hnihah chhun zan zawmin dan loa ram dang aṭanga lak luh kuhva phur lirthei an la châng chhunzawm zel a; mahse, nimin thleng kha chuan kuhva phur lirthei an la tawng lo a ni.