Robert Romawia'n zirlaite a fuih

Modern English Higher Secondary School chuan nimin khan R Dengṭhuama Hall-ah an kum 50-na, golden jubilee an lawm a, minister of state Robert Romawia Royte-in a hmanpui. Minister hian jubilee souvenir ‘Nightingale’ a tlangzarh a, zirlaite fuihna thu a sawi.

Robert Romawia Royte chuan, Salvation Army-te'n kum 1972-a Modern English School an din chu Mizoram chanchinah chhinchhiah tlak a nih thu a sawi a, "Zirna hian lehkha thiamna chauh a huam lo a, zirtirute'n an zirlaite lehkha thiamtir mai bakah, an nunchang thlenga an enkawl ṭhin a pawimawh," a ti.

Zirlaite chu ram leh hnam innghahna pawimawh an nih thu sawiin Minister chuan, "Hnam boral kan nih mai lohna turin zirnaah theihtawp chhuah a ṭul. Thiamna ringawt ni loin, rinawmna, dikna, thawhrimnate hi hnam hmasawnna atan a pawimawh a ni," a ti a; zirlaite chu lehkha zir bakah, an nungchang leh nunphung vawng dik turin a chah.

Modern English HSS-ah hian zirlai 800 vel an awm mek a ni.