Draft SRDC Manual kalzel turin pawm

Sialkal Range Develop-ment Council (SRDC) chu nimin khan an chairman Dr L Thangmawia, MLA kaihhruaiin SRDC Head-quarters Office, Mim-bungah an ṭhukhawm a, Draft SRDC Manual - 2022 chu Mizoram sorkara kalzel turin an pawm.

Ṭhukhawm chuan SRDC chhunga khaw hrang hrangah faina leh thianghlimna kawnga hmalakna beihpui thlak ni se, kumthar kumbul lamah a bulṭan nan hmalak nghal ni se, an ti a; SRDC chhunga zirtirtu indaih loh bikna khua - Vaikhawtlang leh Selam khuaa zirtirtu rawihte tana lawmman pek dan turte an sawiho.

SRDC chhunga sorkar leh khawtlang enkawl sikula pawl 9 leh 11 zirlai thlan chhuah bikte tan kumthar sikul chawlh hun remchangah study tour neih rawtna leh SRDC hnuaia Culture & Literature Committee report-te an pawm a; Council member-te tan exposure tour neih an rêl bawk.

SRDC chhungah hian khaw paruk a awm a, an headquarters chu Mimbung niin, Aizawla Venghluiah Cell Office an nei.