Aizawl hmun pahnihah heroin man

Excise & Narcotics department (END) leh Central Anti Drug Squad (CADS) chuan December 15, Ningani khan Aizawla hmun pahnihah heroin kg. 4 leh gram 26 (hawng 310) an man a; heroin kawltute lakah Narcotics Drugs & Psychotropic Substances Act, 1985 tlawhchhanin thubuai ziak luh a ni.

END leh Central YMA hnuaia CADS ṭang dun chuan December 15 zing dar 1:30 khan Upper Republic Vengah heroin gram 37 (hawng 3) leh a neitua puh Lalsiamchhunga (23) s/o Biakzama (L), Sialhawk, Upper Republic Venga khawsa mek nia inchhál an man a ni.

Heroin man an chhuina kal zelah December 15 tlai dar 3:30 khan Venghnuaiah heroin kg. 3 leh gram 989 (hawng 307) an man leh a; a neitua puh Lalchhandama (22) s/o Lalhrilliana, Sialhawk,. tuna Venghnuaia khawsa mek nia inchhal an man bawk.

END chuan thuchhuah siamin, tunlaiin Mizoram hmun hrang hrangah ruihhlo a hluar hle tih an tarlang a; ruihhlo doa thawktu CADS leh hmun hrang hranga pawl hrang hrangte chungah an lawm thu an sawi rualin, Krismas leh kumthar thlamuang taka mipuiin an hman theih nan ruihhlo leh a khawihtute man kawngah END ṭanpui zel turin mipui an sawm a ni.