Ramri vèn dan ṭha ber chu intodelh - Agriculture Minister

Agriculture minister C Lalrinsanga chuan Agriculture Development Board member-te nen nimina Kolasib district-a custom hiring centre (CHC) leh progressive farmer-a telte an kawmnaah, ramri vèn dan ṭha ber chu intodelh a nih thu a sawi. 

C Lalrinsanga chuan, hun khirh tak karah ei leh bara intodelh tumna kawngah mipuiin hma an sâwn nasa a, sâwt lehzuala hmasawnna thlen turin uluk taka ruahmanna siam a ṭul thu a sawi a, "Ei leh bara harsatna kan tawh loh nan loneitute hna thawk theia kan siam a pawimawh," a ti. Kolasib district chu leilet záwl tamna hmun a nih angin, ei leh bara intodelh tumna kawngah district pawimawh tak a nih thu a sawi bawk.

Inkawmhonaah hian leileta bâwng chhawr tur awm lo chungchang te, hnam dang tlànsan/chhuahsan leilet chung­chang te, CHC ṭangkai zawka hman dan tur leh buh chi ngaihtuah dan turte sawiho a ni. Minister hi Serlui bialtu MLA Lal­rin­sanga Ralte-in a ṭawiawm.