Real Madrid-in kum 16 mi an inrempui

Spanish club lian Real Madrid chuan Palmeiras rawlthar duhawm Endrick chu contract an ziahpui a, mahse, kum 16 mi forward hian July 2024-ah European champion hi a zawm ve chauh ang.

Endrick-a man zat leh contract rei zawng hi tarlan ni lem lo mah se chhiahte (tax) nen vek pound maktaduai 62 bawr vel niin khawthlang media-ten an tarlang a, kum thum atan contract a ziak phawt ang a, kum thum dang a pawhsei theih dawn niin an sawi bawk.

Brazil Under-17 tan vawi li inlana goal nga khung thei Endrick hian October 2022 khan Palmeiras senior team tana a match hmasa ber a khel ve chauh a, league match sarih khela goal thum khungin assist vawi khat a nei.

Endrick hian karlehah a club thar hmun hma a tlawh dawn a, a la zawm theih loh chhan hi kum 18 a la tlin loh vang a ni - FIFA danah player-in kum 18 an tlin hmain ram dang club an zawm thei lo a ni.

Kum 18-a tlin huna Real zawm tur Endrick chuan, "Vawiin ka thlen theih nana ka mamawh zawng zawng min tihsaktu Palmeiras chungah lawmthu ka sawi a, ka thinlungah hmun pawimawh an chang reng ang.

"Ka duhthlanna leh beisei te min tihhlawhtlinsak avangin lawmthu ka hrilh bawk a, Real Madrid ka zawm hma chu a hma ang tho khan Palmeiras tan theihtawp ka chhuah dawn a ni," a ti.

Palmeiras president Leila Pereira chuan, "Brazilian football-a indawrna ropui ber chu a hlawhtling ta. Endrick-a theihna leh thiamna leh Real min dawrna hi a inbuk tawk em em a, indawr ṭantirh aṭanga kan duh angin thil a kal a ni," a ti.

Endrick hi Palmeiras tana a match hmasa ber a khelh khan kum 16, thla hnih leh ni 16 mi chauh a ni a, Palmeiras tana inlan thei naupang ber record a siam - a hnu ni 19-ah goal khungin, club tana goal khung thei naupang ber a ni bawk.