Mizoram sorkarin OMB hmangin Cheng vbc. 150 a pûk leh dawn
Mizoram sorkar chuan open market borrowing (OMB) hmangin loan cheng vaibelchhe 150 a pûk leh dawn. Sorkar kum kal mek 2022-23 chhungin Mizoram sorkar chuan OMB hmangin ṭum ruk loan a pûk tawh.
Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in a buaipui a; RBI chuan OMB hmanga Mizoram sorkarin sum pûk tur a zawn thu December 16, 2022 khan an tarlang.
OMB hmanga sum pûk a nih theih nan RBI-in state sorkar tan sum pûk tur a zawng a, financial institution-te'n an chháng ṭhin. Mizoram sorkar sum pûk tur chháng duh tan RBI chuan December 20, 2022 thleng chhanna hun a hawng a ni.
OBM hmanga sum pûk chu kum khatah a pung vawi hnih rulh tur a ni a, kum 10 velah pawisa pûk zawng zawng rulh a ngai a; a punna chu 7-8% vel a ni.
Hriat theih chinah sorkar kum kal mek chhungin Mizoram sorkar chuan OMB hmangin ṭum ruk loan a pûk tawh a, a pûk zat belh khawm chu cheng vbc. 740 a tling.
Financial year 2022-23 chhunga OMB hmanga RBI aṭanga sum pûk phalna Mizoram sorkarin a neih zat chu cheng vbc. 990 a ni. Tun dinhmunah cheng vbc. 740 a pûk tawh a, cheng vbc. 150 a pûk leh chuan cheng vbc. 890 a pûk dawn ta tih a ni a; sorkar kum kal mek chhungin OMB hmangin cheng vbc. 100 a la pûk thei tihna a ni.