No Tolerance Drive chhunga Sum chawi zat cheng nuai 8.21
Aizawl Traffic Police leh Transport department-in December 12-17, 2022 chhunga Aizawl khawpuia inngaihhnathiamna awm loa dan bawhchhiate manna hun, No Tolerance Drive/Checking an kalpuiah dan bawhchhia mi 229 manin, pawisa an chawitir a, pawisa chawi tling khawm chu cheng nuai 8.21 a tling.
Dan bawhchhia pawisa chawitir mi 229-te chu dan an bawhchhiat dan azirin pawisa chawitir an ni a, dan pakhat aia tam bawhchhia mi eng emaw zat an awm. Mi 229 pawisa chawitir ni mah se, dan chi hrang hrang 716 bawhchhiatnaah pawisa chawitir an ni.
Dan bawhchhia an man tam ber ṭum chu December 17 kha niin, mi 55 an man a, an man tlem ber ṭum December 16-ah mi pariat an man.
Vanglaini palai zawhna chhangin Traffic Police hotute chuan, No Tolerance Drive an kalpui chhunzawm zel dawn leh dawn lohah thutlukna an la siam lo tih an sawi a, "A ṭul dan angin hma kan la chhunzawm zel ang," an ti.