HSLC 2020-ah zirlai 12,324 an pass

Mizoram Board of School Education (MBSE) chuan nimin chawhnu dar 1 khan High School Leaving Certificate (HSLC) Examination 2020 result a tichhuak a, zirlai exam 18,036 zinga 12,324 an pass a, pass percentage chu 68.33 a ni. Pass zat hi nikum aiin mi 541-in an tam zawk a, pass percentage pawh nikuma 67.93 aiin a ṭha hret.

HSLC 2019-ah hian pakhatna mi pathum an awm a, St. Paul's Higher Secondary School zirlai vek niin mark 476 ṭheuh an hmu. Pakhatnate chu - Lalhlimpuii d/o C Vanlalsiama, Khatla te, Simon Lalremsiama Shangpliang s/o Kyrshanbor Shangpliang, Ramhlun North leh Singo­khai Chozah d/o C Thahe, Mission Veng te an ni.

Kumin HSLC Examina­tion-ah hian exam hma­chhawntu zirlai 18,036 an awm a, regular student 17,712 leh private-a exam mi 324 an ni a; pass zawng zawng zirlai 12,324 zingah hmeichhia tlem zawkin 6,914 an ni a, mi 8,422 chu mipa an ni. Regular-a exam zingah 12,219 (68.99%) pass in, private candidate 324 zinga 105 (32.41%) an pass.

Zirlai pass 12,324 zinga 851 chu distinc­tion-ah an pass a, nikuma distinction-a pass zat 1,177 leh kum 2018-a distinction-a pass 1,068 aiin an tlem zawk. First division-ah zirlai 2,863, second division-ah 4,516 leh third division-ah zirlai 4,094 an pass. Compartmental chance nei zirlai 160 an awm a, zirlai 5,552 an fail a ni.

Kumin HSLC-ah hian top 10-ah mi 19 an lang a, subject mala full mark hmu an awm lo. Zirlai exam pass vekna sikul 65 an awm laiin, pass awm miah lohna sikul 16 a awm thung. Candidate-te pass vekna sikul hi nikumah 72 (kum 2018-ah 105) a awm a, zirlai fail vekna sikul nikumah 24 (kum 2018-ah 15) a awm bawk.

Tun hnaia HSLC Examination-a pass percentage zat chu - kuminah 68.33%, kum 2019-ah 67.93%, kum 2018-ah 76.65%, kum 2017-ah 72.17%, kum 2016-ah 71.17%, kum 2015-ah 68.30%, kum 2014-ah 67.51%, kum 2013-ah 58.63%, kum 2012-ah 72.27% a ni.