Police-in methamphetamine man

Champhai police-te chuan December 17, Inrinni zan dar 10:30 vel khan Zokhawthar aṭanga Aizawl pana tlân TATA 712 motor aṭangin crystal methamphetamine kg. 20 an man a, international market-ah cheng nuai 6,000 hû a ni.

Police tarlan danin, ruihhlo hi bungraw dang nen dah pawlhin China siam thingpui fûn 20 chhungah thuhrûk a ni a; lirthei khalhtu leh neitu Sanghleithanga (39) s/o Laldingliana (L), Zemabawk chu man nghal niin, Champhai Police Station-ah thubuai ziah luh a ni.

Police-in an chhui zuina kal zelah inhnamhnawih dang pahnih - Lalthlamuana (56) s/o Kapcheuva (L) leh Vanlalngura (32) s/o Hmingliana, Edenthar Veng, Aizawl ve ve nia inchhálte pawh Aizawl District Special Branch-te'n nimin khan an man a, Champhai lamah hruai an ni dawn. A kaihhnawih leh thlun zawmpui dangte chhui zui mek a ni bawk.