MJA-in Advance Christmas an hmang

Mizoram Journalists' Association (MJA) General Headquarters chuan kum danga an lo tih tawh ṭhin angin December 17, Inrinni khan Aizawl Press Club-ah Advance Christmas an hmang. MJA hian ṭanpui ngaite ṭanpuina tur Charity Fund an thawh khawm mek bawk.

MJA Advance Christmas hi vice president Lalremsiama'n a kaihruai a; thu sawitu MJA president C Lalrambuatsaiha chuan, Krismas lo thleng turah an ngaihtuahnate Pathianin luah se a duh thu sawiin, "Thinlung a lamah hawn ila, ro thil dang a ngai tawh lo, tih a nih angin, tun Krismas-ah hian Pathian duh zawngin hun hmang ila, kan thinlung a lamah i hawng ang u," a ti a, hlim taka Krismas hmang turin MJA member-te leh an chhungte ṭheuh duhsakna a hlàn.

MJA President chuan, Mizo zingah la valai tak tak thi an tam a, mipa an thi tam zual tih sawiin, "Zirlaite'n thlànmuala mitthite kum an zir chiannaah, mitthite kum chawhrual chu kum 52 chuang hret chauh a ni a, India rama life expectancy average kum 69 pawh kan pha lo hle. Kan inenfiah a ngai khawp mai a, nunphung hrisel kan ngaih pawimawh a ngai a ni," a ti.

C Lalrambuatsaiha chuan, chanchinbumite'n Krismas chawlh an hmang dawn tih sawiin, "Nupui fanaute nen, ṭhiante nen hlim takin, zalen takin, hahdam takin hun i hmang ang u, hahdam taka awm kan mamawh," a ti a; taksa tana ṭha lo thei lakah insûm turin MJA member-te a chah.

MJA Advance Christmas-ah hian intihhlimna hun hman a ni a, tlaian zanriah an kîlho nghal.

MJA Gen.Hqrs hian kum danga an tih ṭhin angin mi harsa zawkte ṭanpuina turin Charity Fund an thawh khawm leh mek a, MJA member-te leh MJA duhsaktu mi ṭhenkhatte'n Rs 40,000 vel an thawh khawm tawh a; la thawh zel theih a ni bawk. Charity Fund-a sum lutte chu mi harsa zawkte hnenah an hlàn dawn a ni.