CYMA President-in Central YMA hmingin Krismas duhsakna Mizo mipuite a hlân

Central YMA president R Lalngheta chuan Krismas leh kumthar thuchhuah a tichhuak a; Mizoram leh khawvel ram hrang hranga Mizote chu thlamuang tak leh hlim taka hunpui hmang turin CYMA hmingin duhsakna a hlàn.

CYMA President chuan, nunna a hlu tak zet tih sawiin, "Mizote phei chu kan la tlem êm avangin kan nunna hi a hlu zual bik a ni," tiin, YMA member zawng zawng leh Mizo mipuite chu hunpuiah an nun uluk turin a ngen a; lirthei hmanga chetsualna awm thei lakah te, fimkhur loh vanga thihna thleng thei lakahte fimkhur turin mipui a chah.

Hâlpuah leh hâlmawite chu YMA-in a duh loh em em leh sorkarin a khap a nih thu sawiin R Lalngheta chuan, hâlpuah leh hâlmawi tel loa hunpui hmang turin mipui a ngen a, "Tlang hrang hranga YMA hruaitute he hunpuiah hian kan theihtawpin tar leh upa zawk te, hmeichhe áwm ném leh nunaute himna ngai pawimawh a, kan khawtlang ṭheuh a nawm leh zual theih nana theihtawp chhuah ṭheuh turin kan inngen a. Mizo nun ze mawi tak - chanhai, riangvai, pachhia, lusún leh ṭanpui ngaite tana hun tam zawk hmang turin kan inchah a ni," a ti.

Kumin 2022 chhunga lusunte an hre reng tih sawiin Lalngheta chuan, Krismas lo thleng turin an thinlai náte thâwi dam se an duh thu a tarlang a; Krismas leh kumthar vuakvêtah mahni in lum leh nupui fanaute awp lum hman loa khawtlang himna tura thawktu zawng zawngte an chhuan thu a sawi.

CYMA President chuan, Myanmar leh Bangladesh ram lama harsatna thleng vanga Mizoram bèltu zawng zawngte an hre reng tih sawiin, "Kan tih theih tâwk tam lua lo mah se la, kan hunpui berah hian in tawrhna hi kan rawn ṭâwmpui reng dawn che u a ni," a ti bawk.