Nghakuai chiaha intihsiak buatsaih a ni

Kolasib Anglers Society chuan December 17, Inrinni khan 'Luia nungchate humhalh' tih thupui hmangin Tuichhuahenah nghakuai chiaha intihsiakna, 1st Kolasib Fishing Competition an buatsaih a, Fisheries minister K Lalrinliana'n a hawng. Nghakuai chiah intihsiakah hian mi 56 an tel a ni.

Minister K Lalrinliana chuan, Mizoram chu kawng hrang hrangah intodelh tura ṭan lak a ngaih thu a sawi a, "Luia nungchate uluk taka humhalh a nih chuan nakin lawkah lui lam saa kan mamawh intodelhna turah hma kan sawn lehzual dawn. Chumi tur chuan sorkar hnuaiah dan hrang hrang duan a ni," a ti.

Túr, bomb leh kawlphetha hmanga luia nungcha suat a nih ṭhin avangin harsatna hrang hrang a thleng thei tih sawiin Minister chuan, "Uluk leh mumal taka lui humhalh a pawimawh. Zin mite hìp nan leh a tui mite tan nghakuai chiaha intihhlimna buatsaih kan intihhmuh hi luia nungchate humhalh a ṭulzia inzirtirna hun ṭha tak a ni," a ti a; dil sangha intodelhna turin Pradhan Mantri Matsya Sampada Yojana kaltlangin sorkarin hma a lak thu a sawi bawk.