KHAWTHLIR

Thisen pe
December 17, Inrinni khan KṬP, Aizawl Branch chuan ZMC blood bank tan thisen unit 39 an pe a, petute mipa 31 leh hmeichhia pariat an ni a; KṬP, Chaltlang Branch pawhin Civil Hospital, Aizawl tan thisen unit 32 an pe a, petute mipa 29 leh hmeichhia pathum an ni. Inrinni vêk khan ECM KTP, Siaha-in District Hospital tan thisen unit 47 an pe a, petute mipa 41 leh hmeichhia paruk an ni. Chawngte Group YMA leh Kamalanagar College NSS huaihawtin Chawngte-L community hall-ah mipa 38 leh hmeichhia pangate'n Lunglei Civil Hospital tan thisen unit 43 an pe bawk.

Zawrh phal loh
Champhai district magistrate James Lalrinchhana chuan, Champhai district-ah phalna nei loa petrol leh diesel zawrh leh hralh phal a nih loh thu a tarlang a; dan bawhchhiate chu The Essential Commodities Act, 1955 Section 7 hmanga hrem theih an nih thu a tarlang bawk.

BJP-in hmang
BJP, Mizoram Pradesh chuan December 17, Inrinni khan an pisaah Ek Bharat Shreshtha Bharat programme an hmang. Ek Bharat Shreshtha Bharat-in a tum chu, India ram chu hnam leh sakhaw hrang hrang zawmtu a nih angin, state leh union territory hrang hranga chengte hnam nunphung, infiamna, chaw ei siam dan, infiamna, rimawi, ṭawng leh thil dangte inzirtir tawn leh inhriatthiam tawn a ni.

Black belt hlân
Minister of state Lalruatkima chuan December 17, Inrinni khan Mizoram Rural Bank conference hall-ah Mizoram Amateur Taekwondo Association buatsaih World Taekwondo Black Belt Award hlanna inkhawm a hmanpui. Minister chuan, "Mizoram timawitu in ni tih inhria a, India ram páwnah par chhuak thei turin ṭan la ang che u," a ti. Inkhawmah hian mi 42 hnenah black belt hlan a ni a, MATA hnuaiah black belt nei mi 316 an awm tawh a ni.