State páwn aṭanga lo hawte daih tur quarantine hmun siam tum a ni
Covid-19 leh inkharkhip vanga state hrang hranga Mizo tangkhang hruai haw mekte leh la hruai haw turte len vekna tur khung hranna (quarantine centre) Mizoram sorkar chuan siam ngei a tum.
Home department aṭanga Vanglaini thu dawn danin, phai aṭanga rawn haw turte chu an tam tham avangin quarantine centre atana ruahman tawhah an len loh theih avangin, kohhran hall-ahte dah dan tur ngaihtuah a ni. Hemi atan hian Mizoram Synod hruaitute biak an ni tawh a, Synod hruaitute chuan remchangah an ngai.
Hetih lai hian, Mizoram Synod chuan veng hrang hranga kohhran hall-te chu an enkawl a nih loh avangin, a enkawltu tualchhung kohhran hruaitute beráwn turin Home department hotute an chah.
State páwn aṭanga rawn haw turte tan hian home quarantine dil theih a ni. Home quarantine duhte chuan an awmna district ṭheuha DC office-ah an dil ang a, chumi hnuah an awmna local task force (LTF)-te'n an in an endik hnuah, him tâwka an ngaih chuan DC-in home quarantine phalna a pe thei ang. Task force-te'n him loa a hriatte chu home quarantine phalsak an ni dawn lo.
May 12, Thawhlehni tlai thleng khan state páwna tangkhangte buaipui tura sorkarin a din Task Group on Migrant Workers & Stranded Travellers-ah Mizorama haw duh inhriattir chu mi 9,790 an tling tawh a; Committee hotute chuan, inhriattir belh an awm zel avangin haw duh an pun zel an ring a ni.