Lungleiah Faina Kawngzawh buatsaih

India ram pum huap khawpui fai inelna, Swachh Survekshan 2018 hmachhawn tura inpuahchahna kal zelah UDPA department bultumin nimin zing khan Lungleiah faina kawngzawh (walkathon) buatsaih a ni.

Kawngzawh ṭan hmaa inkhawm buatsaihah Lunglei additional DC Benjamin Lalzama chuan, faina lama sorkar hmalakna hrang hrang tihlawhtling turin mipui mimirin fai duh tak takna thinlung an put a ṭul tih a sawi a; khawpui fai inelna Swachh Survekshan 2018 hmachhawn tura inpuachahnaah mipuite thawhpuiah a sáwm.

Lungleia UDPA officer Andrew Lalhruaia chuan, Swachh Survekshan 2018 inelna atana inbuatsaih dan a sawifiah a, "Khawpui chhung hmun hrang hranga tui luankawr tihfai mek a nih bakah, retaining wall hnawih vâr (white washing), vantlang bawlhhlawh báwm dah, khawpui phiah fai leh thenfai hnate kalpui a ni," a ti.

Walkathon-ah hian sorkar official, tlawmngai pawl aiawh te, zirna in hotute leh mipui ṭhahnem tak an tel a, AOC aṭangin Venglaia MIZOFED kawt zâwl thleng kawng an zawh a ni.