Minister-in DC online a hawng

Lawngtlai Deputy Com­missioner’s (DC) Online leh Health Worker Monitoring Sys­tem (HWMS) chu nimin khan DC conference hall-ah minister C Ngunlian­chunga'n a hawng.

C Ngunlianchunga chuan DC online chu mipuiin sorkar hnathawh dana an duh khawp loh leh mamawh an neihte an thlen theihna leh department hrang hrangin rang taka mipuite harsatna an chin fel theihna tur hmanraw tangkai tak tur a ni tih sawiin, "District mipui leh department tin te’n a nih tur ang takin hman ṭangkai se a duhawm hle," a ti.

Sorkar hna thawkte chu mipuite tana thawk an ni tih inhria a, dawr nuam leh rilru zau tak pu mi ni turin a chah C Ngunlianchunga chuan, "Hriselna kawnga mipui nena inngheng hnai ber an nih avangin health worker-te chuan ram leh khawtlang hrisel nan an hna tha taka an thawh a ṭul," a ti a, mi rinawm tam tak an awm laiin hna thawk ven leh vil tlat ngai an awm ṭhin avangin health worker-te hna thawh vil theihna hmanraw ṭha tak neih chu a pawimawh thu a sawi.

DC online kal tlang hian mipuite department hrang hrang laka lungawi lohna emaw mamawh an neihte emaw an thlen thei dawn a ni. DC office chuan hei hi lo dawngin, department-ah an thawn chhawng ang a, department-in an lo ching fel thuai ṭhin dawn a ni.

HWMS hmang hian health worker-te’n an bial an fan dan leh nu nau pai an tlawh dan te chu system-ah an report ṭhin ang a, hemi hmang hian an hna an thawk ngei em tih a lo hriat theih dawn a, health worker hna thawk tha lo an awm paw’n awlsam takin a hriat zung zung theih dawn a ni.