KHAWTHLIR

Collection bin pe
Rongjeng Technologies (World Bank) chuan Aizawl Press Club-a dah turin bawlhhlawh báwm, e-waste collection bin an hlan. E-waste collection bin hi nimin khan Rongjeng Technologies state coordinator Vanlalzari'n Aizawl Press Club-ah a hlan a ni.

Synod Office
Mizoram Synod pisa chu December 21, Ningani thleng hawn a ni dawn a, December 22 aṭanga khâr tur niin, January 8, 2018-ah an hawng leh ang. Synod Office chuan December 21 hian kumin kum tawpa pension-a chhuak turte thlahna hun an hmang dawn a ni.

MZP-in phût
MZP chuan thuchhuah siamin, tun hnaia MPSC-in Mizoram Civil Service (Combined Competitive) Examination 2017 result a tihchhuahah Mizo ni lo (non-tribal) pakhat MFAS atan a tling niin an tarlang a; pawi an tih thu sawiin, Mizoram sorkar leh MPSC chu thil awmzia sawifiah tur leh result chu en ṭha leh turin an phût tih an sawi.

Bengchheng khap
Lawngtlai SP Lalsang-lura chuan thupek chhuahin, Motor Vehicle Rules 1989-a Rule 119 (2) hmangin December 14, 2017 aṭang khan Lawngtlaiah lirtheia ri ring chi (proton, etc.) vuah leh horn ring lutuk, ri bengchheng leh chi hrang hranga ri ruai ruai chi hman a khap. Thupek bawhchhiate chu MV Act 1988 Section 179 (1) hmanga hrem theih an nih thu a puang bawk.

Plan pawm
Champhai District Disaster Management Authority chu nimin khan additional DC Lalsangpuii Hmar hoin DC conference hall-ah an ṭhukhawm a; Champhai District Disaster Management Plan 2017 an thlirho a, an pawm.

Lirtheiin tái hlum
Lalṭhapuii (6) d/o Siamtei, Kawnpui chu nimin khan Silchar aṭanga Aizawl lam pana tlan truck AS-11 BG-4473-in a tái a, ká chhawn lohin a hmunah a thi. Truck khalhtu Sidar Haque Majumder, Silchar chu Kawnpui Police-te'n an man a, thubuai an siamsak.