Sum chungchanga CM thusawi ZPM, PRISM leh BJP-te'n an dem

Mizorama political party hrang hrangte chuan nimina thuchhuah an siamah, chief minister Zoramthanga, Finance department enkawltuin Mizoram sum dinhmun a sawi thei lo chu an dem. CM-in sum dinhmun a hre lo chu lungawithlak loh an tih thu te, thil zahthlâk tàwpa an ngaih thu te, Finance enkawl hna chu mi dang kuta dah tura an phut thute an tarlang.

ZPM Legislature Party leader Lalduh­oma'n May 11-a Mizoram sum dinhmun leh hripui dona atana sum dinhmun sorkarin a puan chian ṭul a tih thu a tarlan, chief minister Zoramthanga'n May 12-a a sawifiahnaah, "Pathian chauh lo chuan tu mahin a hriat theih loh," a ti chu mipui tan a lungawithlak loh hlea an ngaih thu ZPM chuan an tarlang.

ZPM party chuan, Chief Minister chu Finance minister a nih bawk avangin tuna Mizoram sum dinhmun a sawi thei tura an ngaih thu sawiin, "Sum hmanna tura ruahmanna pawh a sawi thei ngei tur a ni a, a sawi duh lo a nih chuan 'Ka sawi duh lo,' ti mai se. Pathian hming chhála sawi pial dan kawng zawn ngawt hi sum chabi kawltu rinawm tih dan turah kan ngai lo," an ti.

PRISM party chuan, "CM Zoramthanga, Finance minister ni bawkin Mizoram sum dinhmun dik tak a sawi thei lo hi thil ni thei lo hulhual leh zahthlâk tàwp a ni," an ti a; Mizoramin sum dinhmun fiah taka sawi thei tur Finance minister a mamawh tak zeta an ngaih thu an tarlang.

Covid-19 léng vangin state budget chu ruahman anga hman theih a ni lo a, ruahman lâwk loh sum tam tak sèn a ni a, pawisa dawn tura hriat lâwk loh pawh dawn a ni tih sawiin PRISM chuan, "CM berin sum tamzia a sawi reng laiin sorkar hnathawk hlawh cut tumna a awm lawi a. Kan dinhmun dik tak hi mipuiin kan hriat a ngai a, hre tùrin dikna pawh kan nei. Kan sum dinhmunte puang tùrin sorkar kan ngên a ni," an ti.

PRISM chuan, kum 2020-21 chhunga Mizoram budget-ah a taka hmuh tur zat hriat theih a ni lo tih sawiin, "Hlawh (salary leh wages) leh pension hi khawih danglam theih miah loh a ni a, a dang erawh chu a ṭul dan azira ruahman ṭhata tihdanglam theih a nih a rinawm. Budget hi siamṭha (re-appropriate) a, kan mamawh anga siam rem turin sorkar kan ngên a ni," an ti a; sorkar laipuiin finan­cial emergency a puan theih avangin, chumi hmaa hma la turin sorkar an ngen a ni.

Chief Minister leh Finance Minister nihna chelh kawptu ram hruaitu lú berin a hriat loh leh a sawi pawha sawi chian ngam loh khawpin sum hman a ni tawh tih a chianga an hriat thu sawiin PRISM chuan, "BAFFACOS ang maia chin pherh a, dik lo taka duhsak záwng vûr nana hman a nih kan ring hial. Chuvangin, state sum hman dan chiang taka puan chhuahna (white paper) chhuah turin sorkar kan ngen a... Kan sum dinhmun chiang taka sawi thei tur Finance Minister kan mamawh tak zet a ni," an ti.

BJP, Mizoram Pradesh chuan, Finance enkawltu CM Zoramthanga'n, 'Mizoram sum dinhmun dik tak te, India ram sum dinhmun dik takte tu ma'n a sawi theih loh, rin thu pawhin sawi a harsa, Pathian chauhin a hria,' tia a sawi chu mak an ti a, Pathian hming a lam tel chu ṭul loa an ngaih thu leh Pathian thu hmanga mipui bum tumnaa an ngaih thu an tarlang.

Finance Minister chu Mizoram sum dinhmun 'Hei hi ka vaibél, hei hi ka kut zungpui,' tih khawpa Mizoram sum dinhmun leh ni tina Treasury-a sum che vel leh sum awm hre tura ngaih a nih thu sawiin BJP chuan, Zoramthanga chu Mizoram state Finance enkawl hna tlin loah leh a ngaihna hre lo-ah an puh a, "Finance minister hna mi dang kian mai turin media kaltlangin kan ràwn a ni," an ti.

NEC-in Covid-19 dona atana Mizoram hnena cheng nuai 300 a pek chungchangah Chief Minister-in 'Covid-19 vanga a hranpaa min pek a ni lo, kan chanvo tur sa a ni,' a ti chu BJP chuan, "CM leh Finance minister hian dâwt hmanga mipui bum a tumna leh sum chhehrelh tumnaah kan ngai," an ti a; cheng nuai 300 pek thu chu DoNER Minister-in hmarchhak state-a BJP president-te phone-in a hrilh vek a, sum hman dan lo thlir zui turin a chah vek niin an tarlang.