CYMA-in ruihhlo do chhunzawm

Central YMA chuan thla hnih chhung ruihhlo do an chawlhsan hnuah nimin aṭang khan ruihhlo do an ṭan leh a; ruihhlo do ṭanna hun hi CYMA pisaah CYMA president hlui Lalbiakzuala'n a hawng.

Lalbiakzuala chuan, ṭhalai tam tak nunna suattu, fahrah tam tak suattu ruihhlo avangin harsatna tâwk Mizoramah an tam tawh hle tih sawiin, "Theihtawp chhuahin kan do ṭhin a, mahse, kan do ruihhlo hi a chak em a, hlawhtlinnate chu awm ṭhin mah se, duh angin kan hneh thei lo. Ruihhlo vanga mumal lo tam tak an awm mek, ruihhlo nena indo kan puan a ngai a ni," a ti.

Ruihhlo do chu YMA kutah chauh dah a nih chuan hneh a harsat tur thu sawiin Lalbiakzuala chuan, "Ruihhlo do tur hian thawhho a ngai. Kohhran leh sorkar pawhin an tih tur an tih a ngai a, theihtawp chhuaha ṭanho a pawimawh. Tluangtlam taka do ringawt chuan do hneh chi a ni lo," a ti a; ruihhlo donaah dan hrûl deuha hmalakna a awm a nih pawhin hriatthiam chin neih a ṭul thu a sawi.

Lalbiakzuala chuan, ruihhlo do kawngah YMA branch ṭhenkhat chu an muthlu deuh tawha a hriat thu sawiin, YMA branch-te chu an huam chhung ṭheuh humhim tura pên chhuak turin a sâwm.

CYMA Kumpuan Committee chairman R Lalngheta, CYMA vice president chuan, hunpui lo thleng turah ruihhlo a hluar avangin mipui lam aṭangin ruihhlo do tura ngenna CYMA-in a dawn tam thu a sawi a, "Ruihhlo dona atan hian ṭanpuina pawh eng emaw zat kan dawng. Ngenna a nasat avangin Kumpuan Committee chuan CEC-ah a thlen a, CEC-in rem min lo tihsak a ni," a ti.

R Lalngheta chuan, Mizoramah ruihhlo a tam a, overdose (OD) hriat tur an pung tih sawiin, "Chu'ng mite chhan chhuak tur chuan hma kan la dawn a ni. Excise leh Police-te nena kan thawhho piah lamah, dan ang leh a ṭul angin kan thiam ang zelin hma kan la ang. A chakawm lo khawp mai," a ti a; khaw vawt hnuaiah ram chhanna atan pên chhuak turin YMA member-te a sáwm.

Ruihhlo do hawnna inkhawm hman zawh hian CEC member-te leh CYMA Kumpuan Committee member-te chu hmun hnihah inṭhenin, ruihhlo do hna an thawk chhunzawm nghal.

October 2017-a YMA Conference neih a nih rualin CYMA hnuaia ruihhlo do pawl SRS hun a tawp a, chumi hnuah CYMA chuan ruihhlo do hna a chawlhsan hrih a, SRS din leh hunah ruihhlo do hna chhunzawm leh tura tih a ni. Mahse, mipui lam aṭanga ngenna an dawn nasat avangin SRS din thar leh a nih hma chuan ruihhlo do hi CYMA Kumpuan Committee leh CEC-te'n an kalpui phawt dawn a ni.

CYMA chuan, ruihhlo kaihhnawiha an mante chu thuneitute hnenah hlan nghal zel an tum a, a ṭul dan azirin home pawh hman ṭangkai an tum. Ruihhlo vanga harsatna tâwk mimal, chhungkua leh khawtlang tan eng hunah pawh mobile phone number - 9862357002 leh 897490314-ahte biak theih a nih thu CYMA hruaitute chuan an sawi.