Lo neih chungchangah ṭhukhawm

Agriculture Development Board team-1 member Lalropuia Pachuau leh Lalsangliana Hnamte te chu nimin khan Lunglei DC conference hall-ah Lungleia Agriculture department-a thawktute leh official dang te, kut hnathawktu te, tlawmngai pawlte leh media mite nen an ṭhukhawm a; Farmer’s Helpline hmang ṭangkai turin kut hnathawktute an chah.

Lungleia Agriculture officer Tlawng­timawia Zote sawi danin, Lunglei district-ah thingtlang lo neih (jhumming cultivation) kalpui mek chhungkaw 9,436 an awm a, ram hectare 5,962-a zau lo an nei mek. Covid-19 lèn hnuah ram hectare 141.3-a zau chul rih thar a ni a, khaw parukah thlasik buh (Mizoram pumah thlasik buh, winter paddy thar awmchhun) kalpui mek a ni.