Hospital hmanraw neih thar tlangzarh
NEDP sum hmanga Lawngtlai District Hospital-a hmanraw hrang hrang an dah tharte chu December 18, Thawhṭanni khan Lawngtlai West bialtu MLA C Ngunlianchunga'n a tlangzarh.
C Ngunlianchunga chuan, sorkar hnathawkte’n chanvo pawimawh changa ṭhutthleng an luahin an nihna tak a lang chiang ṭhin tih sawiin, "Tun hnaia Lawngtlai District Hospital-in hmasawnna tam tak a neih hi DMS leh doctor te, nurse leh thawktu dangte inpekna rah a ni. Mizoram sorkarin NEDP kaltlangin ram hmasawnna tur thil hrang hrang a duang a, Lawngtlai Hospital pawh a chhawrtu hmasa a ni hi a lawmawm hle," a ti.
District Hospital-in hmanrua a neih thar chu hriselna kawnga district dâwm kângtu a nih tur thu sawiin Ngunlianchunga chuan, "Aizawl Civil Hospital chu Lawngtlaiah sawn a ni ta ang hiala ngaih theih a ni. Kan district hi kawng engkimah a hnufual ṭhin a, sorkar hnathawkte’n anmahni theihna zawn ṭheuhah theihtawp an chhuah loh chuan hmasawnna hmel hmuh tur a awm dawn lo," a ti a; sorkar hnathawkte chu theihtawp chhuaha district hmasawn nana hna thawk turin a chah.
Lawngtlai Hospital medical superintendent Dr Lalmalsawmi Hmar chuan, DoNER aṭanga dum hmuh hmangin damdawi-in building sak mek a nih thu te, Trauma Centre sak a nih tur thu te, damdawi-in fai intihsiakna Kayakalp-a an tel avangin hmasawnna tam tak an neih thute leh doctor ṭha tak tak 10 an neih avangin sorkar chunga an lawm thute a sawi.
Lawngtlai District Hospital-in NEDP sum hmanga hmanrua an neih thar hi hmanraw chi hrang hrang 36 a ni a; a langsar zualte chu - horizontal sterilizer, endoscopy machine, ultrasound machine, colposcope, egg recorder, defibrillator, fogging machine, wheelchair leh weighing machine-te a ni. Khawl leh hmanrua an neih thar zawng zawng hi cheng nuai 73.85 man a ni.