Ruihhlo dona atana hman turin HM-in CYMA hnenah Rs. 8,00,000 a hlan

Home minister R Lalzirliana chuan December 18, Thawhṭanni khan Central YMA hnenah ruihhlo dona atana hman turin Rs. 8,00,000 a hlan a; sumte hi CYMA chuan YMA branch hrang hrang hnenah a sem nghal.

Sum inhlanna hi CYMA Hall-ah neih a ni a; R Lalzirliana chuan, Home department, Excise & Narcotics department leh YMA-ten thawhhona thuthlung an ziah tawh chu kengkawh reng a nih thu sawiin, "YMA tel loin Mizo nih a kim lo. YMA chu tun hma aṭanga Mizo nun tikimtu leh kan hnam nun mawi tak vawiin thlenga chawi kângtu, ram leh hnam humhalhna kawnga mite tana huat pawh hlau loa ram tana inpe awm khawmna a ni," a ti.

Mizoram dinhmun enin, Mizo mipate an thih nasat avangin hmeithai an tam phah tih sawiin Home Minister chuan, "YMA nihna hi lek kawh lehzual a ngai tih kan inhriatchhuah thar a ngai. Kan pipute khan phût let nei loin khawtlanga ṭanpui ngai leh rethei zawkte an khai chhuak ṭhin a ni," a ti a; ṭhian chhan thih ngam mi huaisen hnam nihna chu kawng hrang hrangah lan chhuahtir zel a pawimawh thu a sawi.

Sum hlanna inkhawm hi Central YMA president Vanlalruata'n a kaihruai a; Rs. 8,00,000 hi YMA sub-headquarters Champhai, Serchhip, Mamit leh Kolasib hnenah Rs. 40,000 ṭheuh, Lunglei sub-headquarters hnenah Rs. 50,000 hlan a ni a, a bâk zawng chu YMA branch hrang hrangah sem a ni.