KHAWTHLIR

TQM an lawm
Tobacco Quitters of Mizoram (TQM) chuan thuchhuah siamin, Mizoram mipui vaihlo laka fihlim lo zat 67.2% ni ṭhin, Global Adult Tobacco Survey-2 report-ah 58.7%-a a tlahniam ta chu lawmawm an tih thu an tarlang. Mizoram dinhmun chu duhthusam la ni lo mah se, vaihlo zuk leh hmuam ti zat an tlahniam thei chu thawktu hrang hrangte thawhrimna rah a nih thu sawiin, lawmawm an tih thu an sawi a ni.

Khawl sem
MLA Lalruatkima chuan nimin khan a bial chhung, Tuikual South-a puan ṭhuia eizawngtute hnenah puanṭhui khawl a sem. Puanṭhui khawl semna inkhawm hi Tuikual South YMA Hall-ah hman a ni a; Lalruatkima chuan, "Kan ramah hmasawnna a lo lut mek zel a, a hlawhtlinna kawngah sorkar mawphurhna a nih rualin, mipui pawhin a dawnsawn danah mawhphurhna kan nei a ni," a ti. Puanṭhui khawl hi mi 32 hnenah pek a ni.

Legal aid clinic
Aizawl District Legal Services Authority chuan December 18, Thawhṭanni khan Sialsuk Police Station-ah Legal Aid Clinic an buatsaih a, Aizawl additional SP Lalrinawma Ṭaite-in a hawng. Legal Aid Clinic-ah hian Sialsuk Village Council-te pawh an tel a ni.

Chak lawm
BJP Mizoram chuan Thawhṭanni khan Gujarat leh Himachal Pradesh MLA inthlana BJP-in hnehna an chan chu Millenium Centre leh Treasury Square-ah an lawm a, an president Dr. JV Hluna chuan, "State pahnihah hian sorkar ṭha tak an siam kan beisei bakah, Mizoram pawh hre reng turin kan chah a ni," a ti.

Heroin man
Champhaia Excise & Narcotics departmentenforcement staff-te chuan, December 18, Thawhṭanni) zan dar 7 khan Champhai Zotlang leh Mualkawi inkar kawngpuiah heroin gram 172.2 leh a neitua puh Lalrinkima (42) s/o Vandailova, Tuirial nia inchhál an man. Lalrinkima hi NDPS Act tlawhchhana thubuai siamsak a ni.