Endik thar zinga mi 15 fihlîm

Zoram Medical College (ZMC) Covid-19 Laboratory-a May 12, Thawhlehnia mi 18-te swab sample endik zinga 15 chuan Covid-19 an kai lo tih finfiah a ni a, mi dang pathumte erawh chu nimin khan endik ṭhat leh a ni.

Thawhlehnia swab sample endik tawh, ni­mina endik nawn lehte nen nimin khan mi 48-te swab sample lâka endik a ni a, he thu ziah lai hian result a la chhuak lo. Nimina swab sample endik zinga a tam zawk chu ramria duty-te sample a nih thu, SRH-ZMC Covid-19 Bulletin, nimin tlaia tihchhuah chuan a tarlang.

State Referral Hospital (SRH)-ah nimin khan rinhlelh thila dah luh (admit) thar an awm lo a; chutih rualin, awm mek mi 12 an awm a, chu'ngte chu Risk Ward-ah pahnih, SARI Ward-ah mi pakhat, Make Shift ICU Ward-ah mi pakhat leh Holding Ward-ah mi pariat an awm a ni.

Mizoram sorkar thu­chhuah tarlan danin, nimin tlai dar 5 thleng khan Mizoram hmun hrang hranga screening point-a state páwn aṭanga rawn lutte enfiah tawh zat chu 82,125 a ni a, chu'ng zinga 849 chu nimina enfiah an ni. Nimin vêk khan quarantine centre-a dah luh thar mi 18, home quarantine-a dah thar mi pahnih, Rapid Antibody Test (RAT) hmanga en­fiah mi 162 an awm bawk.

Covid-19 hripui len tirh aṭanga nimin tlai dar 5 thlenga quarantine centre-a khung hran tawh zat chu mi 2,273 an ni a; mahni ina inkhung hrang (home quarantine) mi 7,208, RAT hmanga enfiah mi 2,504, RT-PCR hmanga endik mi 10, swab sample endik 224, Covid-19 kai rinhlelh vanga State Referral Hospital-a dah luh mi 50 an awm tawh a ni.