MZU Southern Campus sawiho

Mizoram Youth Commission (MYC) chairman Dr Vanlalṭanpuia, MLA kaihhruaiin nimin khan Lungleia Land Revenue & Settlement pisaah Mizoram University (MZU) Southern Campus hmun tur Mausep, Pukpui ram chungchang sawiho a ni. Meeting-ah hian Settlement officer C Laltleipuii bakah surveyor, officer leh Pukpui V/C member-te an tel.

Dr Vanlalṭanpuia chuan, "MZU Southern Campus hi Mizoram mipui, a bik takin chhim lam district-te tan malsawmna ropui tak a ni," tiin, campus, buil­ding ṭha leh changtlung tak din ngei a nih theih nan sorkarin theihtawp a chhuah zel dawn thu a sawi a; mipui, khaw­tlang hruaitute leh NGO-te ṭawiawmna leh fin­chhuahna a ngen.

Meeting chuan, MZU campus hmun tur survey neih tawh dan an sawiho a, Tlawng lui riverine reserved forest area-te ngun zawkin surveyor leh Pukpui V/C-te'n lo enfel se, ram acre 500-a zau tur ruahmanna lo siam se, an ti.

Sorkar thuchhuah tarlan danin, MZU Southern Campus tur hi teh fel a nih veleh Ministry of Human Resources Development hnuaia Higher Education Funding Agency (HEFA)-ah thawn a ni dawn a, HEFA chuan sum an rawn pe dawn a ni.