Central-in ZMC a la dawn a nih pawhin Tih hmasak ngai a tam - Health Minister

Mizoram sorkarin Zoram Medical College (ZMC) la tura sorkar laipui a ngen chungchangah Health minister Dr R Lalthangliana chuan, kum hnih khata tihfel mai theih chi a ni lo tih a sawi a, "Tih hmasak ngai tam tak a awm," a ti.

Vanglaini palai zawhna chhangin Health Minister chuan, ZMC chu enkawl a hautak hle tih sawiin, "ZMC Governing Council chuan central sorkar hnena la tura ngen mai a rêl. Union Health Minister leh Union Health Secretary-te hnenah min chhâwk zângkhai tura thlen a ni," a ti a; sorkar laipuiin a la dawn a nih pawhin hun a la duh rei tur thu a sawi.

Health Minister chuan, kum 2023 chawhma lamah Medical Council of India (MCI)-in ZMC final inspection an neih dawn thu sawiin, "MCI inspection hi kan paltlang a nih chuan ZMC-a lut hmasa berte aṭangin doctor eng emaw zat an chhuak thei tawh dawn a, kum tin an rawn chhuah belh zel thei dawn a ni," a ti.

Dr R Lalthangliana chuan, ZMC-in hma a sawn tih sawiin, "Kum 2018 khan ICU-ah khum 13 chiah a awm a, tunah chuan khum 50 chuang a awm tawh. Ward hrang hranga khum awm zat pawh a pung nasa tawh a, khum 140-150 vel awm ṭhin kha khum 400 a awm tawh a ni," a ti a; khum 100 dang awm belhtir tuma hmalak mek a nih thu a sawi.

RT-PCR kháwl bakah, kháwl dang chi hrang hrang eng emaw zat bun belh a ni tawh tih sawiin Minister chuan, "Hostel building sak zawh a ni tawh a, pahnih dang sak mek a ni. Quarters-te pawh sak zawh a ni tawh a, Community Medicine building pawh a function tawh. Academic building hawn theih tura peih a ni tawh a, Union Minister-in rawn hawn a tum," a ti.