Bilkhawthlir khaw dáiah Myanmar Kuhva an la châng chhunzawm zel

Myanmar aṭanga dan loa lak luh kuhva rah phurte'n Bilkhawthlir an paltlang lohna turin Kuhva Chingtu Cooperative Society Ltd., (KCCS), Bilkhawthlir member-te chuan an la châng chhunzawm zel.

KCCS-te hi December 14, 2022 khan kuhva phur lirthei an châng ṭan a; Vanglaini palai zawhna chhángin KCCS hruaitute chuan, an duty chhungin kuhva rah phur man an la nei lo an sawi a, "Kan thâwm an hriat avangin an rawn kal ngam loah kan ngai. Mahse, duty chhunzawm zel rih ṭha kan ti," an ti.

Sorkar aṭangin thu dawn an neih loh thu sawiin KCCS hruaitute chuan, "Kan duty chungchangah phal loh thu kan dawng lo a, chuvangin, min thláwpah kan ngai mai," an ti a; Myanmar kuhva rahin an khua a paltlang lohna turin theihtawp an chhuahzel dawn thu an sawi.

Kuhva phur lirtheite chânga endik tur hian KCCS member-te chu national highway-a Chemphai péng leh buhchang péngah an duty a, chhun zan zawmin an awm a ni.

KCCS hruaitute chu nizan khan an ṭhukhawm a, an kal zel dan tur an rêl dawn nia thu dawn a ni a; he thu ziah lai thleng chuan an rorel kan hre hman lo.