Minister aṭanga Dr K Beichhua bàntir duh loin Siahaah punkhawm huaihawt ; MNF MDC pathum MNF aṭangin an báng

Minister of state aṭanga báng ta Dr K Beichhua bàntir a nih vanga lungawi loh lantir nan nimin khan Siaha district-a tlawmngai pawlte huaihawtin Siahaah sit-in demonstration huaihawt a ni. Hetih lai hian, Mara Autonomous District Council (MADC)-a MNF aṭanga thlan tlin member of district council (MDC) pathumte chu MNF aṭangin an bâng.

Minister aṭanga Dr K Beichhua bàntir an duh lohzia lantir nan hian Siaha district-a pawl lian pathum - MTP, MChP leh Mara Students Organisation-te chuan nimin chawhma dar 11 khan Siaha Bazar traffic point-ah punkhawm an huaihawt a; pawl pathum president ṭheuhin thu an sawi.

Thu sawitute chuan, minister aṭanga Siaha bialtu MLA Dr K Beichhua paihthlak a ni chu pawi an tih thu leh an dem thu an sawi hlawm a; MADC sorkar paihthlak tâkah pawh sorkar thar a pian thuai theih nan hma la turin Mizoram sorkar an phût bawk.

Hetih lai hian, MADC-a MNF MDC pathum - S Lalremthanga, Lalrosanga leh J Vabeikiasa te chuan nimin khan MNF President hnenah MNF primary member an nihna aṭanga an bân thu an hriattir a; MTP, MChP leh MSO-te'n an ngen anga báng an nih thu an tarlang.

MDC pathumte chuan MNF aṭanga an bànna lehkhaah, MADC sorkar awm lo leh ram mipuiin an tawrhna avangin pawl pathumte'n pawi an tih thu tarlangin, "Kan ADC-in a tawrh a, a ram mipuite'n an tawrh bawk avang leh NGO ngenna hi a zahawm a, duh thlan tur nei ta loin keini pathumte hian MNF party member kan nihna aṭanga bànna kan rawn thehlut a ni," an ti.

Thu dawn danin, MNF aṭanga báng ta MDC pa­thumte hi tun hnaia MADC sorkar bûknaa MNF leh Congress party sorkar inṭâwm bûknaa vote thlak lote an ni a; chuvang chuan, MNF Gen. Hqrs. aṭangin insawifiah tura tihna lehkha an dawng a ni.

MDC pathumte chuan MNF Gen.Hqrs-ah sawifiahna an thawn a; an insawifiahnaah chuan, an thil tih chu MNF Gen.Hqrs hriatpuinaa ti an nih thu leh, an tisual a nih chuan hriatthiamna an ngen thu an ziak nia thu dawn a ni.

Hetih lai hian, MADC-a BJP Legislature Party leader M Laikaw chuan, sorkarna an siam theih thu leh chief executive member atan ruat tura ngenna Governor hnenah a thlen tawh a, mahse, Governor aṭangin chhanna an la dawng lo nia thu dawn a ni bawk.