MZP-in Bangladesh ráltlânte an ṭanpui

Mizo Zirlai Pawl Gen. Hqrs chuan nimin leh Pathianni khan Bangladesh aṭanga sahimna zawnga Mizorama rawn lut Zo hnahthlak, Lawngtlai district-a awm mekte hnenah ṭanpuina an hlân.

Bangladesh ráltlânte hi MZP hruaitute chuan tun hnai khan an tlawh a; Pathianni khan Chamdûr-P leh Mautlang khuaa ráltlânte tlawhin ṭanpuina an pe a, nimin khan Vaṭhuampui leh Parva III-a awmte hnenah ṭanpuina an hlân leh bawk.

MZP hian tun hnaia Zofest an buatsaihah ráltlânte ṭanpuina tur báwm a dawh a, chuta sum tling khawmte chu ráltlân hnenah an hlàn a ni.

Bangladesh aṭanga ráltlânte chu Chamdûr-P, Mautlang, Parva leh Vaṭhuampuiah an awm tih sawiin MZP chuan, "An harsatnaa buaipui tur hian an awmna hmunah Village Committee on Bangladesh Asylum Seeker din vek a ni," an ti.

MZP tarlan danin, Bangladesh ráltlânte chu Parva III-ah chhungkaw 34, Vaṭhuampuiah chhungkaw 23, Chamdûr-P ah chhungkaw 14 leh Mautlangah chhungkaw 10 vel an awm mek. Damdawi, mutbu, silhfen, tarpauline, tui dah khawlna, bungbel leh hnathawhna hmanruate an mamawhna a sang hle niin an tarlang.