Rorelna ṭha chungchang zirho a ni

Good Governance Week pualin nimin khan district hrang hranga bawrhsap pisate'n an district-ah sorkar ṭha (good governance) chungchang zirhona an buatsaih.

Sorkar laipui chuan December 19-25, 2022 inkar hi Good Governance Week atan a puang a, Week chhunga tih tur hrang hrang duan a ni.

Aizawl DC pisa chuan 'Workshop on Good Governance Initiatives/Practices in Aizawl District' an buatsaih a, Aizawl bawrhsap Dr Lalhriatzuali Ralte-in a kaihruai. DC pisaa officer te, college leh university hotu te, Aizawl DC lo ni tawh Vanhela Pachuau leh C Ropianga te an tel a; Labour, Employment, Skill Development and Entrepreneurship department, Traffic Police leh DC Office-te'n an hmalakna an tarlang.

Serchhip DC mawhphurhna la mektu Lalmuansanga Ralte hoin nimin khan DC conference hall-ah Good Governance Week pualin Workshop on Good Governance Practices (Sushan Saptah Prashasan Gaon Ki Aur) buatsaih a ni.

Lalmuansanga Ralte chuan, sorkar hnathawkte chu mipui tana an hun puma thawk tura lâkte an nih thu a sawi a, "Kan nunah kan hna a hmasak ber a ngai. Kan tih tur hmasa ber hi kan hriat chian chuan thawktu ṭha kan ni mai dawn a ni. Ram ṭha leh hmasawn neih kan duh a, chutiang nei thei tur chuan hna thawktute hian kawng tam takin mawh kan phur a ni," a ti.

Tarlan danin, Serchhip district-ah hian VC 54 leh common service centre 77 an awm mek a, VC 55 zinga pangaah CSC a la awm lo. DC Online aṭangin income certificate 2,503, residential certificate 1,438, permanent residential certificate 55 leh tribal certificate 1,717 pek chhuah a ni tawh.

Siaha DC conference hall-ah bawrhsap Lalsangliana'n Good Governance Week a hawng a, good governance chungchanga an zirho nghal. Siaha District Hospital-a chief medical officer Dr Lalnunziri'n kum nga chhunga an hmalakna leh an hlawhtlinna a tarlang a; supply officer Vanlalchhuanga leh District Education Office aiawhin Jenny Lalthanpuii ten an department hmalakna, hlawhtlinna leh hmalak dan turte an sawi.

Mamit DC Lalnunhlua chuan DC conference hall-ah Good Governance Week a hawng a, sorkar department hrang hrang hotute'n good governance chungchang an zirho. Bawrhsap chuan, sorkar hnathawkte chu mipui tana thawk an nih angin biak nuam, mipui harsatna chinfelpui tura engtik lai pawha biak theih leh dawr theih ni turin a chah.