Kan ram Krista hmél dik tak lanna tur ram hruaitu kan mamawh - BJP President

BJP, Mizoram Pradesh chuan nimin khan an pisaah Advance Christmas leh kumin atana pisa khàrna hun an hmang a; BJP president Vanlalhmuaka chuan, Mizoramin Krista hmél dik tak a lan theihna tur ram hruaitu a mamawh thu a sawi.

Vanlalhmuaka chuan, Kristian tamna ramah Krista hmel hmuh tur a awm lo nia sawiin, pawi a tih thu a sawi a, "Kan ram hruaitute en ila, Kristian inti siin ram kan kaihhruai danah Krista hmel a lang lo. Kan ram Krista hmél dik tak lanna tur ram hruaitu kan mamawh tawh hle a ni," a ti.

BJP President chuan, "Kan ram hausakna leh ṭhalaite tana hmakhaw êng siam turin a ngaihna hria BJP hi Mizoram mipuiin sorkarna an pek a ngai a ni," a ti a; Mizoramin leilung hausakna tam tak a neih leh ram nuam leh boruak nuam an neihte chu hmang ṭangkai thiam ram hruaitu neih a ṭul thu a sawi.

Vanlalhmuaka chuan, BJP kaihhruai sorkar laipuiin scheme ṭha tak tak, miretheite chawi kànna tur a duang tih sawiin, "Kan sorkar hian a lo hmang ṭha duh miah lo a, ram mipui mirethei tam takte an vui phah. Retheihna sal ata kan state chhan chhuah a nih theih nan BJP hi Zoram mipui hian min en ve chhin se kan ti a, kohhran hruaitute pawh hian min rawn zir chiang se," a ti.

Mizoram BJP President hian Mizoramah Krista hmel leh Zo nun mawi dik tak a lan chhuah leh theih nan ṭan rualpuiah mipui a sáwm a ni.